BISDOM GRAHAMSTAD, Anglikaanse
Kerk van Suider-Afrika.[1]
Bisdom 1853 gestig.
Katedraal: Sint Michiel en Sint Joris, [2] Grahamstad.
Biskopswoning: Bishopstowe, Grahamstad.
Huidige wapen aanvanklik blykbaar in 1886 aangeneem, en deur die College of Arms verleen volgens oktrooibriewe gedateer 12 Augustus 1949. Die blasoen lui:[3]
In silwer, op ’n rooi kruis ’n golwende swaard in sy natuurlike kleure; in die eerste kwartier ’n swart anker.
Brownell[4] skryf: “Die katedraal in Grahamstad is tans toegewy aan Sint Michiel en Sint Joris en hierdie wapen bestaan uit die swaard van die aartsengel en die Sint Joriskruis. Die anker is die skakel tussen hierdie wapen en dié van die metropolitaanse bisdom. In die wapen van die
Bisdom Bloemfontein word die swaard meer korrek afgebeeld as “vlammend”.
Vir die oorspronklike wapen wat deur die bisdom gevoer is, kyk hierdie bladsy.
Oor die bisdom:
Sedert die huidige wapen in gebruik geneem is, is die bisdom se grondgebied driemaal verminder deur die afstigting van nuwe bisdomme.
Die eerste was dié van George (1911), waarvoor parogieë in die weste van die Bisdom Grahamstad, Graaff-Reinet ingesluit, geneem is. Die tweede was dié van Port Elizabeth (1970), waar parogieë weereens aan die westekant verloor is.
Sedertdien strek die bisdom langs die kus vanaf die Keirivier tot by die Kariega.
In die jare tagtig het die bisdom die pos geskep van suffragaan-biskop, op Queenstown gebaseer, wat verantwoordelikheid vir die noordelike gebiede sou oorneem. Beide die eerste en die tweede suffragaan, Eric Pike en Bethlehem Nopece, het daarna biskop geword van Port Elizabeth.
In 2008 het Queenstown die setel geword van ’n nuwe bisdom, dié van Ukahlamba, met insluiting van die noordelike dele van die Grahamstadse bisdomsgebied en die suidelikste dele van die Vrystaat (uit die bisdom wat op Bloemfontein gebaseer is).
Biskoppe: Die huidige wapen is in gebruik geneem onder Biskop A B Webb (1883 ingewy). Hy is opgevolg deur C E Cornish (1899), F R Phelps[5] (1915), A H Cullen (1931), Robert Selby Taylor[6] (1959), G L Tindall (1964), Bill Burnett[7] (1969), Kenneth Oram (1974), David Russell (1987) en Thabo Makgoba[8] (2004)
Tale:
Die Bisdom Grahamstad gebruik Engels, Afrikaans en isiXhosa in administrasie en aanbidding.
